Ingunn Hildur Hauksdóttir

Ingunn er fædd árið 1969 og stundaði nám hjá Kristínu Ólafsdóttur við Tónlistarskóla Hafnarfjarðar og lauk píanókennara- og einleikaraprófi frá Tónlistarskólanum í Reykjavík 1993 þar sem hún naut þar leiðsagnar Jónasar Ingimundarsonar. Ingunn sótti einkatíma um tveggja ára skeið í London hjá Roger Vignoles. Ingunn er haustið 2022 að ljúka Meistaranámi í hljóðfærakennslu frá LHÍ með áherslu á spunavinnu ungra píanónemenda.

Ingunn hefur sl. 20 ár tekið virkan þátt í íslensku tónlistarlífi með áherslu á kammertónlist. Hún hefur gert upptökur fyrir útvarp og geisladiska og komið fram á tónleikum hérlendis og erlendis, oft með áherslu á kynningu og flutning íslenskrar tónlistar.

Ingunn hefur leikið með ýmsum kammerhópum og m.a. flutt fyrir Kammermúsíkklúbbinn píanókvintetta og -sextetta eftir R. Vaughan Williams, J. N. Hummel, L. Farrenc, F. Schubert og F. Mendelsohn ásamt frumflutningi íslenskrar tónlistar fyrir tríó eftir Elínu Gunnlaugsdóttur og Báru Grímsdóttur.

Ingunn hefur starfað við kennslu í rúmlega 30 ár og kennir píanóleik við Tónlistarskóla Garðabæjar ásamt því að starfa sem meðleikari við Menntaskóla í Tónlist. Í píanókennslunni vinnur Ingunn markvisst með spuna og leggur áherslu á spilagleði í sinni nálgun.