Ráðstefnan „Tónlist er fyrir alla“ er vettvangur fyrir kennara og stjórnendur tónlistarskóla til að koma saman, deila reynslu og þekkingu og rækta fagleg tengsl við starfsfélaga.

Yfirskriftin gefur tóninn fyrir vítt svið viðfangsefna ráðstefnunnar. Í brennidepli verða áskoranir og tækifæri í tónlistarkennslu og tónlistarnámi, nýbreytni og nýsköpunarverkefni og lifandi umræður um málefni sem snerta tónlistarkennslu á breiðum grunni. Fjallað verður um tónlist og tónlistarnám sem samfélagslega fjárfestingu, hvað sé svona sérstakt við tónlist í því samhengi, og horft á afurðir tónlistarskólakerfisins með víðtækum hætti þar sem skilningur á siðferðilegri og samfélagslegri ábyrgð er til grundvallar.

Tæplega fjörtíu einstaklingar taka þátt í dagskrárliðum ráðstefnunnar sem samanstanda af fyrirlestrum og kynningum, workshop, panelumræðum og hópaumræðu. Botninn í ráðstefnuna slær gestafyrirlesarinn Rick Beato, heimsþekktur YouTuber!

Stefnumiðið er að styrkja tónlistarkennslu og tónlistarmenntun, að veita þátttakendum innblástur og næringu fyrir komandi skólaár og að tónlist og tónlistarnámi verði gert hærra undir höfði í þágu sjálfbærni og velferðar.

Hittumst í Hörpu, fræðumst og skemmtum okkur saman – stillum saman strengi, skerpum fagmennskuna og vörðum saman leiðina áfram veginn!